إندفعت زهره خارج غرفتها وهي تقرر مغادرة الفيلا ومغادرة حياة سيف نهائيا
لتقابلها إلهام وألفت وهم تتحدثان سويا عن ترتيبات الحفل
نظرت إلهام لزهره المنتفخه عينيها بشده من أثر البكاء والمندفعه لخارج الفيلا دون ان تعيرها إهتمام
إلهام بتكبر
= إنتي يا بتاعه إنتي رايحه على فين
زهره بغضب وهي تقف بباب الفيلا الداخلي
= البتاعه دي ليها إسم ممكن تناديها بيه والاحسن لا تناديني ولا أناديكي أنا سيبهالك خالص وماشيه
إلهام بعجرفه
= إستني عندك رايحه على فين و
إذاي تكلميني بالشكل ده انتي اتجننتي
تمتمت زهره بغضب وهي تهم بالخروج سريعا
= جن لما يعفرتكم كلكم كنت نقصاكي انتي كمان
لتتركها وتذهب وسط زهول ألفت وإلهام التي قالت بزهول
= البتاعه دي اذاي تتجرأ وتكلمني كده
لتصرخ بجنون فجأه
= فين رئيس الأمن إلي هنا البت دي متخرجش بره الفيلا
لتتناول الهاتف المحمول وتجري إتصال برئيس الحرس الخاص
وهي تقول بجنون
= البت الي هتحاول تخرج دلوقتي متخرجهاش ..دي حراميه سرقت الاسوره بتاعتي اعرف هي وديتها فين وبعدين ربيها وعلمها الادب وبعد كده اطلب لها البوليس
ألفت وهي ترتعش بخوف
= مش المفروض نعرف سيف بيه الاول
إلهام بتكبر
= وسيف ماله بالخدامين دي بت قليلة الادب هتتربى وخلاص
لتتابع بعجرفه وهي تشير بيدها علامة إنتهاء الحديث
= يلا خلينا نشوف بقيت تجهيزات الحفله مش هنفضل نرغي في الموضوع ده كتير
ألفت وهي تهمس بخوف
= ربنا يستر
وفي نفس التوقيت
وصلت زهره للبوابه الخارجيه للفيلا لتقترب منها ودموعها تتساقط
لتقول للحارس بصوت مبحوح
= أنا عاوزه أخر….
قاطعها الحارس وهو يقول بعنف
= إخرسي يا بنت الكلب
لتتفاجأ بإلتفاف الحرس حولها وأحدهم يجذبها من ملابسها بعنف وهو يقول
بقسوه
= خبيتي الي سرقتيه فين إنطقي قبل مايكون أخر يوم في عمرك
زهره برعب وزهول
= سرقه ..سرقة إيه.. أنا ما سرقتش حا…
لتقاطعها صفعه قويه على وجهها تبعتها أخرى جعلت رأسها تدور وألقتها بعنف على الارض
شعرت زهره بالرعب وهي لا تستوعب
مايحدث لها لتتفاجأ بالحارس يركلها بقوه في جانبها جعلتها تصرخ ليرفعها من شعرها بقسوه
= إنتي هتقولي وديتي الي سرقتيه فين بالزوق والا أخرجك على المشرحه علطول
شعرت زهره بقلبها سيقف من شدة الرعب
وهي تتلقى لطمه جديده على وجهها ثم أخرى
لتشعر بقرب غيابها عن الوعي وهي تحاول فتح عينيها بالقوه لتسمع أخيرا صوت سرينة عربة الشرطه لتتجمد الدماء في عروقها من شدة الفزع وتسقط غائبه عن الوعي
بعد مرور اكثر من ساعه
إستيقظت زهره من غيبوبتها لتجد نفسها في زنزانة قسم الشرطه المملوئه بنساء متهمات من مختلف الاعمار
لتتئوه بألم وهي تحاول الاعتدال في جلستها
لتقول إحدى النزيلات بصوت عالي وهي تساعدها على الجلوس
=إنتي فوقتي ..كبدي عليكي مين المفتري الي عمل فيكي كده
زهره وهي تتلفت حولها بخوف وهي تعتدل بألم
= أنا فين وبعمل إيه هنا
= إنتي في زنزانة القسم يا حبيبتي وجابوكي مغمي عليكي و قالولنا اول ما تفوقي نبلغهم علطول عشان ياخدو أقوالك
استرجعت زهره كل ما حدث معها وهي تنظر بعدم تصديق للمكان من حولها ولملابسها شبه الممزقه لتنهمر دموعها بشده على وجنتها
وهي تقول بألم
= هي دي أخرتها ياسيف عاوز تدخلني السجن ..بتعمل فيا ذي الي عمله أمين فيك زمان بتاخد بتارك مني مش مكفيك كل الي انا فيه
لتغرق في نوبه شديده من البكاء جلبت انظار جميع من حولها لتحاول السيده تهدئتها
وهي تظن إنها خائفه من السجن ومن التحقيق معها
لتميل عليها وهي تربت على زراعها وتهمس بصوت خفيض
= إستهدي بالله كده وإجمدي طالما مش ممسوكه تلابس يبقى متخافيش و أي حاجه يسئلوكي عنها قولي معرفش ومعملتش حاجه وإنتي هتخرجي منها ذي الشعره من العجين
لترفع زهره رأسها بيأس وهي تقول ببكاء
= يعني هخرج لمين أنا مليش حد يمكن السجن رحمه ليا
=متقوليش كده وإستهدي بالله ربنا كبير ومش هيسيبك
ليفتح باب الزنزانه فجأه ويدخل شرطي ينادي على إسمها بصوت عالي
